AFFA İK bir neçə klubu cəzalandırdı
AFFA İntizam Komitəsi II Liqada XII turun oyunları ilə bağlı qərarlarını açıqlayıb.
Sport1.az xəbər verir ki, bir sıra qarşılaşmalarda intizam pozuntularına görə klublara cərimələr kəsilib.
“Ağstafa Gəncləri” – “Qaradağ Lökbatan” matçında qonaq komandanın dörd futbolçusu sarı vərəqə aldığı üçün “Qaradağ Lökbatan” 70 manat cərimələnib. “Quba” – “Xankəndi” görüşündə isə altı oyunçusu xəbərdarlıq alan “Xankəndi” eyni məbləğdə cərimə olunub.
“Şirvan” – “Ağdaş” matçında meydan sahiblərinin altı futbolçusu sarı vərəqə ilə cəzalandırıldığı üçün “Şirvan” klubuna 70 manat məbləğində sanksiya tətbiq edilib.
“Kür-Araz” – “Göygöl” oyununda ev sahibinin 8 nömrəli futbolçusu Cavidan Musazadə ikinci sarıdan qırmızı vərəqə alıb. O, bir oyunluq diskvalifikasiya edilib, “Kür-Araz” isə 50 manat cərimə olunub. Həmin matçda beş futbolçusu sarı vərəqə alan “Göygöl” komandasına da 70 manat cərimə tətbiq edilib.
