Milli komandanın baş məşqçisi forvardın karyera seçiminə müdaxilə etdi

Qana millisinin baş məşqçisi Otto Addo hücumçu Antuan Semenyonun daha yüksək səviyyədə inkişaf etməsi üçün klubunu dəyişməli olduğunu bildirib.

Sport1.az The Athletic-ə istinadən xəbər verir ki, 25 yaşlı forvarda “Liverpul” və “Mançester Siti” kimi nəhənglərin maraq göstərdiyi vurğulanır.

Addo Semenyonun hazırkı komandasında yaxşı çıxış etdiyini desə də, növbəti addımı atmağın vaxtının çatdığını qeyd edib: “Antuan “Bornmut”da özünü əla göstərib. Lakin o səviyyədə bir futbolçu üçün növbəti pilləyə yüksəlmək artıq qaçılmazdır. Bu addımın qışda, yoxsa yayda olacağı fərq etmir. Mən onun nələrə qadir olduğunu dünyanın görməsini səbirsizliklə gözləyirəm”.

Qeyd edək ki, Semenyo ötən yay “Bornmut”la 2030-cu ilə qədər uzunmüddətli müqavilə imzalayıb. Anlaşmada futbolçunun 65 milyon funt-sterlinqə (təxminən 75 milyon avro) transfer oluna bilməsi üçün xüsusi bənd yer alır.

24 yaşlı hücumçu “Bornmut”a 2023-cü ildə “Bristol Siti”dən keçib. O, bu mövsüm Premyer Liqada 13 oyunda 6 qol və 3 məhsuldar ötürmə ilə yadda qalıb.