Mareska "Çelsi"nin qeyri-sabit nəticələrinin səbəblərindən danışıb

“Çelsi”nin baş məşqçisi Enzo Mareska Premyer Liqanın 14-cü turunda “Lids Yunayted”ə 1:3 hesabı ilə uduzduqları matçdan sonra komandanın son vaxtlar göstərdiyi qeyri-stabilliyin səbəblərini izah edib.

Sport1.az xəbər verir ki, italiyalı mütəxəssis ardıcıl iki çətin oyundan sonra eyni ritmi qorumağın mümkün olmadığını bildirib.

Mareskanın sözlərinə görə, “Barselona” və “Arsenal”a qarşı son çıxışlar komandanın hər matçda eyni səviyyədə oynayacağı anlamına gəlmir:

“Son iki oyunda göstərdiyimiz performansa baxanda daha yaxşı nəticə gözləyirdik. Amma ay ərzində “Arsenal” və “Barselona”ya qarşı yaxşı oynamağımız o demək deyil ki, hər dəfə eyni səviyyədə çıxış edə biləcəyik. Bəzi situasiyalar buna imkan vermir. Elə futbolçularımız var ki, onları hər iki-üç gündən bir meydana buraxmaq mümkün deyil”.

Baş məşqçi həmçinin heyətdəki dəyişikliklərin təsirindən də danışıb:

“Oyunçuları dəyişəndə səviyyə aşağı düşür. Bu, reallıqdır. Çünki həmin futbolçular bizim üçün çox önəmlidirlər və istənilən komanda üçün də vacib oyunçu ola bilərlər”.