“Köhlən atlar”dan iki yeni transfer

“Qarabağ” transfer pəncərəsində növbəti addımlarını ataraq iki yeni futbolçunun keçidini elan edib.

Sport1.az xəbər verir ki, Ağdam təmsilçisi nigeriyalı hücumçu Taofik İsmahil və almaniyalı vinger Reda Xadra ilə anlaşıb.

Polşanın “Qurnik” (Zabje) klubundan heyətə qatılan 26 yaşlı forvard Taofik İsmahil ilə 3 illik müqavilə imzalanıb. Təcrübəli hücumçu yeni komandasında 19 nömrəli geyimlə çıxış edəcək. Nigeriyalı futbolçu karyerası ərzində “Şeyd”, “Fredrikstad”, “Volorenqa”, “Loryan”, “Beveren” və “Lex” kimi komandaların da şərəfini qoruyub.

Ağdamlıların digər yeni transferi Reda Xadranın son dayanacağı isə Fransanın “Reyms” klubu olub. 25 yaşlı hücumameylli yarımmüdafiəçi ilə “2+1” il müddətinə müqavilə bağlanıb. O, “Qarabağ”da 10 nömrəli formanı geyinəcək. Dortmund “Borussiya”sının yetirməsi olan almaniyalı vinger əvvəllər “Brayton”, “Birminhem”, “Şeffild Yunayted”, “Blekbern” və “Havr” kimi klublarda oynayıb, həmçinin Almaniyanın U-18 və U-21 yığmalarının şərəfini qoruyub.

Qeyd edək ki, Reda Xadra və Taofik İsmahil “Qarabağ”ın cari yay transfer pəncərəsində reallaşdırdığı 9-cu və 10-cu keçidlərdir. Bunadək komanda Jali Muaddib, Zakaria Savo, Samuel Lobato, Bruno Lanqa, Martin Zlomisliç, Renaldo Sefas, Bense Varkonyi və Cebrail Makreçkisi də heyətinə cəlb etmişdi.