Fransa klubunun azarkeşləri futbolçuları döydü

Fransa Liqa 1-in 14-cü turunda “Loryan”a 1:3 hesabı ilə uduzan “Nitsa”nın futbolçuları oyundan sonra azarkeş hücumuna məruz qalıb.

Sport1.az Footmercato-ya istinadən xəbər verir ki, qarşılaşmadan sonra komandanın bazasına dönən oyunçuların qarşısına nəticələrdən narazı olan təxminən 400 fanat çıxıb.

Azarkeşlər baş məşqçi Frank Ezin istefasını tələb edib və daha sonra futbolçularla gərginlik yaşanıb. Qarşıdurma zamanı itələmə, tüpürmə və fiziki təzyiq halları qeydə alınıb. Ən çox zərər görənlərin yarımmüdafiəçi Jeremi Boqa və hücumçu Teremas Moffi olduğu bildirilir.

Qeyd edək ki, bu məğlubiyyətdən sonra “Nitsa” Liqa 1-də 17 xalla 10-cu pillədə qərarlaşıb. Avropa Liqasında isə komanda 36-cı — sonuncu yerdədir və hələ də xal toplaya bilməyib.