“Liverpul”un qərarı: Klopp niyə gündəmdə deyil?

“Liverpul”un mövsümün bu mərhələsində qeyri-sabit çıxışına baxmayaraq, klub rəhbərliyinin Yurgen Kloppun mümkün qayıdışını gündəmə gətirməsi real sayılmır.

Sport1.az The Telegraph-a istinadən xəbər verir ki, bunun bir neçə səbəbi var.

Əvvəla, alman mütəxəssislə klub rəhbərliyində yer alan Maykl Edvards və Culian Uord arasında vaxtilə yaranmış fikir ayrılıqları hələ də tam aradan qalxmayıb və bu, ehtimalı zəiflədən əsas məqamlardandır.

Digər tərəfdən, “qırmızılar”ın rəhbərliyi komandanın çətin dövrünü anlayır və həm futbolçuların, həm də məşqçilərin müəyyən eniş yaşayacağını normal qəbul edir. Bu, Arne Slotun baş məşqçi postunda davam etməsi üçün səbəblərdən biri kimi göstərilir. Üstəlik, klub 2024-cü ilin yayında niderlandlı mütəxəssisi “Feyenoord”dan vaxtından əvvəl ayırmaq üçün 8 milyon funt sterlinq ödəyib.

Bildirilib ki, Klopp hazırda baş məşqçilik etməsə də, “Leyptsiq”də beynəlxalq əlaqələr direktoru kimi çalışır.

Xatırladaq ki, alman mütəxəssis “Liverpul”u 2015–2024-cü illər arasında idarə edib. Premyer Liqanın cari mövsümündə mersisaydlılar 12 turdan sonra 18 xalla 13-cü pillədə qərarlaşıb.