“Çelsi”nin sabiq əməkdaşını 10 ilədək həbs gözləyir

“Çelsi”də maliyyə qalmaqalı üzə çıxıb.

Sport1.az Goal-a istinadən xəbər verir ki, klubun xəzinədarlıq şöbəsinin sabiq köməkçisi Kler Uolş 2019–2023-cü illər ərzində maliyyə hesablarına çıxış imkanından sui-istifadə edərək 208 min 521 funt sterlinq məbləğində vəsaiti mənimsədiyi üçün məhkəmə qarşısına çıxarılıb.

İstintaq materiallarında onun dörd il ərzində klubun daxili ödəniş sistemindən şəxsi məqsədlərlə istifadə edərək vəsaitləri öz hesablarına yönəltdiyi bildirilir.

Ziyanın yüksək məbləğdə olması səbəbindən iş Vestminster məhkəməsindən İzlurdakı Kral Məhkəməsinə göndərilib. Britaniya qanunvericiliyinə görə, etimaddan sui-istifadə yolu ilə törədilən bu tip dələduzluq 10 ilədək həbs cəzası ilə nəticələnə bilər.

Hazırda hökmün elan olunacağı tarix müəyyənləşdirilməyib. Prokurorluq hadisəni yüksək kateqoriyalı pozuntu kimi qiymətləndirir və real həbs cəzasının mümkün olduğunu bildirir.