Premyer Liqa klubu hakimlərdən AFFA-ya şikayət edəcək – AÇIQLAMA

Misli Premyer Liqasının 12-ci turunda baş tutan “Sumqayıt” – “Qarabağ” oyunundan (2:4) sonra meydan sahibləri hakim idarəçiliyindən narazı qalıb.

Sport1.az-a danışan klubun mətbuat xidmətinin rəhbəri Zaur Xudiyev bildirib ki, “gənclik şəhəri” təmsilçisi AFFA-ya rəsmi şikayət ünvanlayacaq:

“Artıq neçə oyundur hakimlərin bizə qarşı qərəzli qərarları müşahidə olunur. Bəzən nəticəyə təsir etməsə də, müəyyən epizodlarda ittifaq kimi görünür. Amma bir neçə matçda səhvlər açıq şəkildə nəticəyə təsir edib. Xüsusilə dünənki “Qarabağ”la oyunu qeyd etmək istəyirəm”.

Klub rəsmisi iki epizodun xüsusi narazılıq yaratdığını dedi:

“11-ci dəqiqədə Addainin Ramalinqoma qarşı hərəkəti qırmızı vərəqə ilə qiymətləndirilməli idi, amma verilmədi. 59-cu dəqiqədə isə adi oyun epizodunda müdafiəçimiz Rayon Senhaci ikinci sarıdan meydandan qovuldu. Bu, komandanın mübarizə ruhuna ciddi təsir etdi”.

Xudiyev vurğulayıb ki, “Qarabağ” kimi komandanın hakim köməyinə ehtiyacı yoxdur:

“Sadəcə istəyimiz odur ki, hakimlər ədalətli olsunlar. Rəqib komandalara qarşı daha diqqətli yanaşılsın. AFFA-ya rəsmi şikayət göndəriləcək və Hakimlər Komitəsinin obyektiv qərar verəcəyinə ümid edirik”.