“Nəticə yox, komandanın xarakteri məni sevindirdi” – Çexiyaya 1:6 uduzan yığmamızın baş məşqçisi

19 yaşadək futbolçulardan ibarət Azərbaycan millisinin baş məşqçisi Elxan Abdullayev Maltada keçirilən Avropa çempionatının seçmə oyunlarını dəyərləndirib.

Sport1.az AFFA-nın mətbuat xidmətinə istinadən xəbər verir ki, Abdullayev Çexiyaya 1:6 hesabı ilə məğlubiyyəti rəqibin üstün hazırlığı və qırmızı vərəqə ilə izah edib:

“Qrupdan çıxmaq istəyirdik, amma alınmadı. Çexiya onsuz da qrupun ən güclü komandası idi və bunu meydanda tam göstərdi. Üstəlik, Hikmət Cəbrayılzadənin meydandan qovulması işimizi tamam çətinləşdirdi. O, aparıcı futbolçulardan biridir və sonrakı iki oyunda da iştirak edə bilməməsi bizə ciddi təsir göstərdi”.

Baş məşqçi Şimali İrlandiya (0:1) və Malta (2:1) ilə matçlar barədə də danışıb:

“Şimali İrlandiya ilə oyunda yaxşı mübarizə apardıq, qol imkanlarımız oldu, amma dəyərləndirə bilmədik. Malta ilə matçda isə həm yorğunluq, həm də motivasiya problemi vardı. Bununla belə, geri düşdüyümüz halda oyunu çevirdik və qələbə qazandıq”.

Abdullayev komandanın ümumi çıxışını müsbət qiymətləndirib:

“Nəticə ürəkaçan olmasa da, futbolçuların mübarizəsindən razı qaldım. Bu heyətdə potensial var. Sadəcə, klublarla birlikdə daha sıx işləməyə ehtiyac duyulur”.