“Barselona”nın 2,5 milyon avroluq qorxusu – Levandovskidən şok etiraf

Polşa millisinin və “Barselona”nın hücumçusu Robert Levandovski ilə bağlı maraqlı məqam üzə çıxıb.

Sport1.az “Sport.es”ə istinadən xəbər verir ki, futbolçu Sebastian Staşevskinin qələmə aldığı “Levandovski: Həqiqi hekayə” adlı yeni bioqrafik kitabda Kataloniya klubunun rəhbərliyi ilə arasında baş tutan diqqətçəkən dialoqu açıqlayıb. Levandovskinin iddiasına görə, klub rəhbərləri, o cümlədən prezident Xuan Laporta 2022/23 mövsümündə ondan daha az qol vurmasını istəyiblər.

Səbəb maliyyə ilə bağlı olub: əgər Levandovski La Liqa mövsümündə 25-dən çox qol vurardısa, “Barselona” müqaviləyə əsasən “Bavariya”ya əlavə təxminən 2,5 milyon avro bonus ödəməli idi.

Kitabda qeyd olunur ki, bu söhbət komandanın artıq çempionluğu təmin etdiyi mərhələdə baş verib. Levandovski həmin mövsümü 23 qolla tamamlayıb.