Xavi “Barselona”dakı uğursuzluğun səbəbini AÇIQLADI
“Barselona”nın sabiq baş məşqçisi Xavi komandanın son dövrlərdə əvvəlki səviyyəni itirməsinin səbəbləri barədə danışıb.
Sport1.az xəbər verir ki, o, bildirib ki, klubda müəyyən mərhələdən sonra özü müəyyən etdiyi yüksək tələbləri davam etdirə bilməyib.
Xavi “Mundo Deportivo”ya açıqlamasında deyib:
“Barselona”da işə başlayanda oyunçulara və kluba çox yüksək standartlar qoymuşdum. Çünki komanda elə bir dövrdən keçirdi ki, demək olar, tələblər yox idi. Amma sonradan həmin standartları yalnız ilk il qoruduğumu anladım — La Liqanı və Superkuboku qazandığımız mövsümə qədər... Bir müddət sonra özümə sual verdim: “Axı mənə nə oldu?”. Tələblərimi azaltdım və bu, komandanın münasibətinə də təsir etdi. Eyni yanaşma, eyni intizam və eyni səy artıq yox idi. Standartlar tədricən enirdi və son mövsümdə heç bir titul qazana bilmədik. Bu, mənim üçün böyük dərs oldu. Özünü tənqid edə bilməlisən”.
45 yaşlı mütəxəssis 2021–2024-cü illər arasında “Barselona”nı çalışdırıb. Onun rəhbərliyi dövründə katalonlar La Liqanın və İspaniya Superkubokunun qalibi olublar.
