Ronaldo: “Sağlamlığım imkan verdikcə futbol oynamağa davam edəcəyəm”

Portuqaliyalı ulduz Kriştianu Ronaldo Səudiyyə Ərəbistanı çempionatında “Əl-Feyha” üzərində 2:1 hesablı qələbədən sonra fikirlərini bölüşüb.

Sport1.az xəbər verir ki, “Əl-Nəsr”in 40 yaşlı hücumçusu matçda iki dəfə fərqlənib və peşəkar karyerasındakı 951-ci və 952-ci qollarını vurub.

“Komanda qalib gəldi və mən iki qol vurdum — bu, hər zaman önəmlidir. Həmişə demişəm ki, uzunömürlülük yalnız ehtirasla mümkündür və məndə hələ də o ehtiras var. Qol vursam da, vurmasam da, futbol mənim həyatımın bir hissəsidir. 23-24 ildir bu idmanla yaşayıram. Sağlamlığım imkan verdiyi müddətdə meydanda olacağam”, – deyə Ronaldo bildirib.

Qeyd edək ki, təcrübəli forvard 2023-cü ilin yanvarından “Əl-Nəsr” klubunda çıxış edir. O, daha əvvəl “Mançester Yunayted”, “Yuventus”, “Real Madrid” və “Sportinq” kimi klublarda forma geyinib.