Elvin Bədəlov qələbə seriyasına davam etməyin sirrini açıqladı - MÜSAHİBƏ

Misli Premyer Liqasının X turunda "Neftçi" doğma meydanda "Kəpəz"i darmadağın etdi - 5:1

Görüşdən sonra "ağ-qaralar"ın müdafiəçisi Elvin Bədəlov Sport1.az saytına müsahibə verdi...

- "Kəpəz" üzərində rahat qələbə qazandınız. Bu haqda nə deyə bilərsən?
- Rahat keçdiyini deməzdim. İlk dəqiqələrdən oyuna fokuslanmışdıq. İstəyirdik ki, çempionatda ilk ev qələbəmizi alaq. Əvvəllərdə olan konsentrasiyamızdan görünürdü ki, biz favoritik. Böyükhesablı qələbə qazanmağımız daha yaxşı oldu. Bu tempdə yolumuza davam edəcəyik.

- Liqada 10 görüşə çıxmısınız. İlk dəfədir ki, ardıcıl 2 oyunda qələbə qazanırsınız. Davamı gələcək?
- Ümid edirik ki, gələr. Əsas vacib olan oyunumuzu alındırmaq idi. Onu da yavaş-yavaş qaydasına salırıq. Buna fikir verdikcə qələbələr də gələcək.

- Sanki, Abubakarın gəlişindən sonra Sambu da ruhlanıb. Bu gün iki qol vurdu...
- Dəqiq demək də olmur, həqiqətən elədir, yoxsa yox. Amma Sambu da istedadlı hücumçudur. Abubakarın gəlişi ona da motivasiya verib. Hələ ehtiyatda Ağadadaş da var. Belə forvardlarımız olduğu üçün şadıq.

Qarşıdan "Qarabağ"la derbi matçı gəlir. Uğurlu nəticə ala biləcəyinə inanırsan?
- Həmin oyuna yaxşıca hazırlaşacağıq. Ora qələbə qazanmaq üçün çıxacağıq.

- Ağdam təmsilçisinin qarşıda "Çelsi" ilə oyunu var. İstirahətə daha çox vaxtınız olacaq. Bu vəziyyətdən müsbət şəkildə yararlana bilərsiz?
- Onların heyəti böyükdür. Ona görə də, bu məsələyə çox fikir vermək düzgün çıxmaz. Yaxşısı biz özümüz hazırlıq prosesinə diqqət edək.

MİKAYIL HACIYEV