Flik Pedrinin durumunu açıqladı: “Onsuz oynamağı öyrənməliyik”

“Barselona”nın baş məşqçisi Hans-Diter Flik yarımmüdafiəçi Pedrinin son zədəsi ilə bağlı açıqlama verib.

Sport1.az xəbər verir ki, alman mütəxəssis futbolçunun “El-Klasiko”dan sonra narahatlıq hiss etdiyini, lakin müayinə zamanı daha ciddi zədə aşkarlanaraq altı həftəyə qədər meydana çıxa bilməyəcəyinin müəyyənləşdiyini bildirib.

“Pedrinin zədəsi bizi təəccübləndirdi. O, “El-Klasiko”dan sonra bir qədər diskomfort hiss etmişdi, amma müayinədən sonra vəziyyətin düşündüyümüzdən ağır olduğu ortaya çıxdı. Ən yaxşı oyunçularımızdan birini itiririk. O, komandamızın topa sahib olmasında əsas fiqurlardandır. Onsuz oynamağı öyrənməliyik, amma ümid edirəm, tezliklə qayıdacaq”, – deyə Flik vurğulayıb.

Qeyd edək ki, Pedri bu mövsüm “Barselona”nın heyətində 13 oyuna çıxıb, 2 qol və 2 məhsuldar ötürmə ilə yadda qalıb.