"Çelsi"yə aid bu sual Kadini əsəbləşdirdi - MÜSAHİBƏ

Misli Premyer Liqasının X turunda "Qarabağ" "İmişli"ni məğlub etdi - 2:0.

Görüşdən sonra "köhlən atlar"ın yarımmüdafiəçisi Kadi Borges Sport1.az saytına müsahibə verdi...

- "İmişli"yə qalib gəldiniz, qarşılaşma haqqında nə söyləyə bilərsən?

- Çətin matç oldu. Rəqib 5-li müdafiə və önündə 3 dayaq oyunçusu ilə qarşımıza çıxdı. Bu tip komandalara qarşı oynamaq hər zaman çətin olub. Səbrlə oynadıq. Bir çox qol imkanları yaratdıq. Düzdü bir neçəsini qaçırsaq da, əsas 2 qol vurduq. Belə oyunlar bizim üçün çətin keçib.

- "Atletik"lə görüşdən qazandığınız təcrübə və ev sahibi olmağın üstünlüyündən yararlanaraq "Çelsi"dən xal alacağınıza inanırsan?

- "Təbii ki, o görüşün bizə qatdığı təcrübə öz yerində, öz azarkeşlərimizin önündə oynamaq kimi bir avantajımız olacaq. Lakin bizim üçün əsas vacib məsələ səhvlərə yol verməmək və soyuqqanlı olmaqdır. Yaradılan fürsətləri qaçırmasaq istədiyimiz nəticəni ala bilərik".

- "Çelsi" ilə görüşə hazırlaşmaq üçün yetərli vaxtınız olduğunu düşünürsən?

- İstənilən rəqibə qarşı eyni sistem və oyun fəlsəfəsi ilə oynayırıq. Hər zaman eyni tərzdə oyun tərzimiz olduğundan, "Çelsi" ilə görüşə xüsusi hazırlaşmaq" deyə bir şey yoxdur. Bu gün olan qarşılaşmanın özü belə həmin oyuna hazırlıq idi.

- Debütant komandaya qarşı gözləniləndən daha çox çətinlik çəkmək sizdə narahatlıq yaratdı?

- Onların əsas liqaya yeni yüksəlmələrinə baxmayaraq, yaxşı təşkil olunmuş heyətləri var. Müdafiələrini yarmaq bizim üçün çətin idi. Təbii ki, hər aşağı liqadan gələn komandanı gözardı etmək düzgün deyil.

MİKAYIL HACIYEV