Millimiz dördüncü qarşılaşmada Ukraynanı məğlub edə biləcək? - AFİŞA

Dünya Çempionatı 2026-nın Avropa bölgəsi üzrə seçmə mərhələsində D qrupunda mübarizə aparan millimiz səfərdə Ukraynaya qarşı oynayacaq.

Bu gün Polşada baş tutacaq qarşılaşmada nominal meydan sahibləri favorit hesab olunur. Lakin millimizdə yeni baş məşqçi Ayxan Abbasovun gəlişi ilə əzmkar ruh formalaşıb. Yerli mütəxəssisin rəhbərliyində ilk matçı evdə eyni rəqibə qarşı oynamışdıq. Həmin görüşdə 1:1 hesablı heç-heçəyə razılaşmışdıq. Fransaya səfərdə 0:3 hesablı məğlub olduq. Buna baxmayaraq, meydanda döyüşkən komanda gördük.

Ukrayna millisi isə son oyunda səfərdə İslandiyaya 5:3 hesabı ilə qalib gəlib.

Heyətləri müqayisəsini etsək, rəqibin daha üstün olduğunu söyləyə bilərik. Ukraynada Avropanın böyük çempionatlarında çıxış edən oyunçular var. Azərbaycan millisi isə əsasən yerli çempionatda çıxış edən futbolçulardan formalaşıb.

Bu komandalar indiyə kimi 3 dəfə qarşılaşıblar. Bu görüşlərin 1-də Ukrayna qələbə qazanıb, digər 2 qarşılaşmada isə heç-heçə qeydə alınıb. Topların nisbətində də rəqibə uduzuruq - 7:1.

Millimizin Ukrayna ilə oyunlarının nəticələri

28.02.2006 Bakı Yoxlama oyunu / Azərbaycan – Ukrayna 0:0
15.05.2006 Kiyev Yoxlama oyunu / Ukrayna – Azərbaycan 6:0
09.09.2025 Bakı Dünya Çempionatı seçmə mərhələsi / Azərbaycan – Ukrayna 1:1

Qeyd edək ki, Azərbaycan millisi FİFA reytinqində 124-cü, Ukrayna millisi isə 28-ci sırada yer alır.

MİKAYIL HACIYEV