"Daha artığını etməyə gücümüz var" - Elmar Baxşıyev

"Araz-Naxçıvan"ın baş məşqçisi Elmar Baxşıyev UEFA Konfrans Liqasının 2-ci təsnifat mərhələsinin ilk oyunlarında keçiriləcək "Aris"lə (Yunanıstan) matç haqda danışıb.

Sport1.az xəbər verir ki, o, görüşdən öncə keçirilən mətbuat konfransında deyib: "Oyunun mahiyyətini hamı dərk edir. Matça yaxşı hazırlaşmışıq. Ümidliyik, inamlıyıq. Futbolçularım sabah meydanda ən yaxşısını etməyə çalışacaq. Yaxşı komandayıq. Təcrübəsiz görünə bilərik. Amma komandam özünə inanır. Yaxşı hazırlıq keçmişik. Daha artığını etməyə gücümüz var".

Mütəxəssis komandasında təcrübəli oyunçularının olduğunu bildirib: "Komanda Konfrans Liqasında yeni ola bilər. Amma heyətdə olan futbolçular dəfələrlə belə yarışlarda iştirak ediblər. Yaxşı oyunçulara sahibik".

E.Baxşıyev yeni transferlər haqda da söz açıb: "Sərəncamımda olan futbolçuların hamısını mən bəyənmişəm. Hamısı mənim oyun fəlsəfəmə uyğundur. Yoxlama oyunlarında öz ustalıqlarını göstərməyə çalışırdılar. Yaxşı kollektivimiz var. Uyğunlaşma baxımından heç kimin sıxıntısı yoxdur".

O, azarkeşlərə də səslənib: "Bizi dəstəkləsinlər. Onları sevindirməyə çalışacağıq".

Mütəxəssis "Mövsüm başlamadan öncə Naxçıvana gedib azarkeşlərlə görüşməyi düşünürsünüz?" sualına belə cavab verib: "Biz də onları görmək istəyirik. Sıx təqvimdəyik. Bizim təlim-məşq toplanışında naxçıvanlı azarkeşlər iştirak edirdi. Onlarla görüşmüşük. Nə vaxtsa Naxçıvana qayıdacağıq. İndiki durumda daha çox komandaya diqqət ayırırıq".