“Qarabağ”ı darmadağın edəcəyik" - KLUB SAHİBİ

Rumıniyanın FKSB klubunun sahibi, “qanuni oğru” ritorikası ilə danışan Cici Bekali ÇL-in 3-cü təsnifat mərhələsinin püşkünü dəyərləndirib.

Sport1.az xəbər verir ki, onun komandası “Şkendiya”nı keçəcəyi təqdirdə “Qarabağ” – “Şelburn” cütünün qalibi ilə qarşılaşacaq. FKSB-nin ağdamlılarla üz-üzə gəlmək ehtimalı daha realdı və Bekali də bunun fərqindədi:

“Çox yaxşı püşkdü. Biz artıq “Qarabağ”ı məğlub etmişik (ötən mövsüm Avropa Liqasının əsas mərhələsində Bakıda keçirilən oyun rəqibin 3:2 hesablı qələbəsi ilə bitib – red.). Həm də rəqib bizlə qarşılaşmaya qədər cəmi iki rəsmi oyun keçirəcək. Çünki onların çempionatı hələ avqustda start götürəcək. Yaxşı şans qazanmışıq. “Qarabağ”ı udmayandan sonra Çempionlar Liqasına düşmək istədiyini necə deyə bilərsən? Onlar bizim səviyyədə deyil, futbolları da bizim futbolla müqayisəyə gəlmir. Onlar oyunçularını itirib, ritmdən məhrum olub. Biz onları darmadağın edəcəyik! Yaxşı ki, ilk oyunu evdə keçirəcəyik – 2:0 və ya 3:0 udarıq ki, pley-offa vəsiqəni təmin edək”.