Cahangir Fərəcullayevin inkişaf strategiyası fantaziyası - KÖŞƏ

"Premyer Liqamızı daha cəlbedici etmək üçün "APL Fantasy" platformasını təqdim edirik. AFFA-nın İnkişaf Strategiyasının bir parçası olan yeni məhsul uzun müddətdir azarkeşlər tərəfindən gözlənilirdi”.

Bu fikirlər AFFA-nın baş katibi Cahangir Fərəcullayevə məxsusdur. Sitat federasiyanın rəsmi saytından götürülüb.

Əvvəlcədən deyim ki, "APL Fantasy"nin istifadəyə verilməsinə etirazım yoxdur. Dünyanın aparıcı ölkələrində belə platformalar azarkeş marağını artırır, liqanın tanıdılmasına kömək edir. Amma...

İntellektual baş katib Cahangir Fərəcullayev "APL Fantasy"ni AFFA-nın İnkişaf Strategiyasının bir parçası olaraq təqdim edir. Gülməli deyil?

Futboldan anlayışı olan şəxslər bilirlər ki, bu tərz layihələri inkişaf strategiyasının parçası yox, marketinq aləti adlandırırlar. Amma baş katibi dinləyəndə belə təsəvvür yaranır ki, azarkeşlər telefonda heyət quracaq, kapitan seçəcək, bizim futbol da inkişaf edəcək. Kaş ki, hər şey bu qədər asan olaydı.

Azərbaycanda idmanın bu növünün kifayət qədər problemi var. Uşaq futbolu illərdir arzulanan səviyyəyə çatmır. Regionlarda infrastruktur çatışmazlığı var. Hakimlik hər tur müzakirə olunur. Akademiyaların işi ilə bağlı suallar bitmir. Klubların böyük hissəsi hələ də dövlət vəsaitindən asılıdır. Millimiz tanımadığımız, adı-sanı olmayan ölkələrə uduzur...

Belə bir mənzərədə "Fantasy"ni inkişaf strategiyasının tərkib hissəsi kimi təqdim etmək yalnız fantaziya ola bilər. Niyə təəccüblənirik ki? Cahangir Fərəcullayev baş katib olandan sonra AFFA-da primitiv layihələri tarixi hadisə kimi təqdim etmək vərdişə çevrilib.

Gəlin, söhbəti bitirək! "Fantasy" futbolu inkişaf etdirmir. Belə platformalar artıq mövcud olan məhsulu daha cəlbedici edir. Güclü çempionatın "Fantasy"si də maraqlı olur. Problemlərlə boğuşan futbolu isə mobil tətbiqlə xilas etmək mümkün deyil.