Azərbaycan ilk dəfə Dünya Gənclər Çempionatında təmsil olunacaq

Azərbaycan Alpinizm Federasiyasının gənclərdən ibarət milli komandası ilk dəfə idman dırmanması üzrə Dünya Gənclər Çempionatında çıxış edəcək.

Sport1.az xəbər verir ki, yarış iyulun 18-25-də İtaliyanın Arco şəhərində yerləşən Rock Master Climbing Stadium-da təşkil olunacaq.

Dünya Gənclər Çempionatı U17 və U19 yaş kateqoriyaları üzrə Boulder, Lead və Speed növlərində keçiriləcək. Turnir gənc idmançılar üçün bu idman növünün ən nüfuzlu beynəlxalq yarışlarından biri hesab olunur.

Azərbaycan Alpinizm Federasiyası üçün bu iştirak tarixi əhəmiyyət daşıyır. Gənclərdən ibarət milli komanda ilk dəfə dünya çempionatında qüvvəsini sınayacaq. Bu, idmançılarımıza beynəlxalq təcrübə qazanmaq, dünyanın ən güclü rəqibləri ilə mübarizə aparmaq və ölkəmizi yüksək səviyyədə təmsil etmək imkanı yaradacaq.

Arco şəhərində keçiriləcək mundialda 60-a yaxın ölkədən 650-yə yaxın idmançı, 180 məşqçi və komanda nümayəndəsinin iştirakı gözlənilir. Ümumilikdə yarışa 1000-dən çox iştirakçının qatılması nəzərdə tutulub.

Azərbaycan Alpinizm Federasiyası bu çempionat vasitəsilə gənc idmançıların beynəlxalq arenada inkişafını sürətləndirməyi və gələcəkdə dünya səviyyəli yarışlarda davamlı iştirak üçün möhkəm baza formalaşdırmağı hədəfləyir.