PSJ-nin qələbəsindən sonrakı xaos: Fransada 65 nəfər mühakimə olunur

PSJ klubunun Çempionlar Liqasındakı qələbəsindən sonra baş qaldıran kütləvi iğtişaşlarda iştirak edən 65 nəfər hakim qarşısına çıxarılıb.

Sport1.az xəbər verir ki, bu barədə məlumatı Fransanın Ədliyyə Nazirliyinin rəhbəri Jerald Darmanen ictimaiyyətlə bölüşüb.

Nazirin sözlərinə görə, artıq üç nəfər "uzunmüddətli azadlıqdan məhrumetmə" cəzasına məhkum edilib, 12 nəfərə şərti cəza verilib, altı nəfər isə istintaq təcridxanasına yerləşdirilib.

Darmanen "X" sosial şəbəkəsindəki hesabında vəziyyəti belə şərh edib:

"49 yetkin və 34 yetkinlik yaşına çatmayan şəxs hələ hakim qarşısına çıxarılmayıb, onlardan bəziləri ağır cinayətlərdə ittiham olunurlar... Ədalət mühakiməsi müstəqildir. Bunu unutmamaq lazımdır. İcazə verin, o öz işini sakit şəraitdə davam etdirsin".

Qeyd edək ki, mayın 30-u axşam saatlarında PSJ Çempionlar Liqasının finalında Londonun "Arsenal" klubunu məğlub edib. Komanda ardıcıl ikinci ildir ki, bu nüfuzlu turnirin qalibi olur. Lakin matçdan dərhal sonra kütləvi iğtişaşlar başlayıb. Təhlükəsizliyi təmin etmək məqsədilə Fransada təxminən 22 000 polis əməkdaşı səfərbər edilib, onlardan 57-si xəsarət alıb. İğtişaşlarda iştirak edən 219 nəfər də yaralanıb. Ümumilikdə isə 800-ə yaxın şəxs hüquq-mühafizə orqanları tərəfindən saxlanılıb.