Qadın futbolunda "TikTok" erası - KÖŞƏ

Qadın millimiz Andorranı hər iki oyunda məğlub etdi. AFFA rəsmiləri bunu ictimaiyyətə "tarixi uğur" kimi sırıdılar.

Ay qardaş, kimi aldadırsınız? Bu komandanın canı türklər, ruslar, gürcülərdir. Ortada "bizim futbol" deyilən bir şey yoxdur. Bu qələbələr sadəcə ucuz vitrinin bəzəyidir.

Real vəziyyəti görmək üçün U-19-un darmadağın olduğu oyunlara baxın. Aşağı yaş qrupları görülən işin güzgüsüdür. Orada isə biabırçılıqdan başqa heç nə yoxdur. Biz vaxtilə Türkiyəni və Kipri udan komanda olmuşuq. İndi Banqladeş və Andorra ilə özümüzə təsəlli veririk. Ayıbdır, vallah ayıbdır.

​Baş katib Cahangir Fərəcullayevin gətirdiyi Emrah Aykurt hanı? Bu adam gələn gündən A millinin yaxınlığına buraxılmır. Mütəxəssisi aşağı yaş qruplarına sürgün ediblər. Niyə? Bəlkə Zümrüd Ağayeva qabağa getməsin deyə adamın yolunu kəsib? Görəsən, adıçəkilən xanım bu vəzifə qadın futbolunu dirçəltməyə gəlib, yoxsa "TikTok" videoları çəkməyə? Cahangir Fərəcullayev o kreslonu Zümrüd xanıma şou yaratmaq üçün verib? Oyunları 10-0, 20-0 bitən milli sizin inkişafınızdır? Bu, futbol oynamaq deyil, futbolun qəbrini qazmaqdır.

​Görünən odur ki, Rövşən Nəcəf və Cahangir Fərəcullayevin xeyir-dua verdiyi kadrlar futbolu məhv edir. AFFA-da sistemdən və islahatdan danışırlar. Amma qadın futbolu uçuruma gedir. Andorra qələbəsi ilə camaatın gözünə kül üfürməyin. U-19-un bu günü sizin əsl işinizdir. İndi çıxın, bu rüsvayçılığa bir cavab verin.

İLKİN SULTANLI