"Neftçi" Murad Məmmədovun transferindən pul qazanacaq? – Klub rəhbəri AÇIQLADI
Misli Premyer Liqasının 25-ci turunda "Neftçi" - "İmişli"ni darmadağın etdi - 6:0.
Sport1.az xəbər verir ki, qarşılaşmadan sonra "ağ-qaralar"ın baş icraçı direktoru Cenk Sümer jurnalistlərin suallarını cavablandırıb.
Həmin müsahibəni təqdim edirik...
– Oyun haqqında fikirləriniz maraqlıdır.
– Azərbaycan xalqını və "Neftçi" azarkeşlərini təbrik edirəm. Çox gözəl oyun oldu. İstədiklərimizi meydançaya yansıtdıq. Futbolçularımızdan gözlədiyimiz performansı bu oyunda gördük. Rəqibimizi də təbrik edirəm. Onlar da əllərindən gələni etdilər. Sadəcə, nəticədə keyfiyyət fərqi özünü göstərdi. Çətin günlər keçirmişdik, artıq Novruz bayramı ilə birlikdə bayram əhval-ruhiyyəsindəyik. Bahar gəlir, oyunlarımız da yaxşılaşır və daha da yaxşı olacaq. Bu da bizi rəhbərlik olaraq sevindirir. Futbolçularımıza sonuna qədər güvənirik. Hədəfimiz var. Avrokuboklara vəsiqə qazanmaq istəyirik.
– Demək olar ki, komanda ilk dövrədə itirdiyi 5 xalın əvəzini bu oyunda çıxardı?
– Bəli, bunun fərqində idik. Rəqibimiz müdafiə və orta xəttdə yaxşı oynayan komandadır. Tək bizə qarşı yox, digər oyunlarda da bunu göstəriblər. Biz isə rəqibi təhlil etdik və məşqçilərimiz komandanı yaxşı hazırladı. Bəzi çatışmazlıqlarımız var idi. Sambu, Abubakar, Sako müəyyən problemlər yaşayırdı. Buna baxmayaraq, xüsusilə Varqas və yeni transferimiz Breno özlərini yaxşı göstərdilər. Emil Səfərovu ayrıca qeyd etməliyik. Nəhayət gözlədiyimiz Emili meydanda gördük. Bu, həm bizim, həm də milli komanda üçün vacibdir. O, artıq milliyə dəvət alıb. Ümumilikdə, yerli oyunçularımızın inkişafı bizi sevindirir. Baş məşqçimiz gənclərə şans verən mütəxəssisdir və yeni oyun modeli formalaşdırır.
– Mövsümün sonunda müqaviləsi bitən futbolçularla bağlı işlərə başlanılıb?
– Hazırda əsas məsələ mövsümü hansı yerdə bitirəcəyimizdir. İlk "dördlük"də yer alıb avrokuboklara vəsiqə qazansaq, ona uyğun transfer siyasəti aparacağıq. Məqsədimiz komandanı yenidən qurmaq deyil, mövcud heyəti gücləndirməkdir. Qış "transfer pəncərəsi"ndə də gördünüz ki, cəmi bir oyunçunu heyətə cəlb etdik. Komandanı şişirtmək yox, faydalı futbolçular cəlb etmək istəyirik. Bu proses baş məşqçinin planı ilə həyata keçiriləcək.
– Murad Məmmədovun transferi ilə bağlı son vəziyyət necədir?
– "Pafos" tərəfindən ciddi maraq var. Murad da legioner olmaq istədiyini əvvəldən bildirmişdi. Biz ona dəstək olduq. Çünki Murad akademiyamızın yetirməsidir. Hədəflərini gerçəkləşdirmək istəsə, buna hörmətlə yanaşırıq. Transfer olunsa, onu qürurla yola salacağıq və daim izləyəcəyik.
– Müqaviləsi bitdiyi üçün klubun qazanc əldə etməsi çətin görünür. Bu məsələ necə həll olunacaq?
– Azad agent statusunda olan futbolçunu transfer etmək daha rahatdır. Amma burada "yetişdirmə haqqı" məsələsi var. Bu, kifayət qədər ciddi məbləğdir. Bizim əsas istəyimiz Muradın Azərbaycanı və "Neftçi"ni xaricdə təmsil etməsidir. Bu, digər gənclər üçün də motivasiyadır. Əlbəttə, transferdən gəlir əldə etmək istərdik, amma əsas məqsəd futbolçunun inkişafıdır. Bu mövsüm daha çox şans qazandı və özünü göstərdi. İnanırıq ki, gələcəkdə milli komandada da əsas oyunçulardan biri olacaq.
– Baş məşqçi Yuri Vernidub növbəti mövsümdə komandada qalacaq?
– Hazırda işlər istədiyimiz kimi gedir. Onunla davam etmək üçün danışıqlar aparırıq. Məşqçidən razıyıq, o da bizdən razıdır. Komandaya gec qoşulmasına baxmayaraq, ruh və enerji qatdı. Amma hazırda əsas məsələ müqavilə deyil, mövsümü hansı yerdə bitirəcəyimizdir. Yuri müəllim də Bakıda xoşbəxt olduğunu bildirib.
– Komanda avrokuboklara vəsiqə qazansa, Abubakar kimi ulduz transferlər gözlənilənmi?
– "Neftçi" böyük klubdur, burada hər şey mümkündür. Abubakarın transferi təsadüfi deyildi. Gələcək transferlər də məşqçinin istəklərinə uyğun olacaq və büdcə çərçivəsində həyata keçiriləcək. Ulduz transferlər mümkündür, amma bizim əsas məqsədimiz futbolçuları burada inkişaf etdirərək dünya futboluna təqdim etməkdir.
MƏHƏMMƏD HÜSEYNOV
