Rüfət Abbasovdan etiraf: "Əlimizə düşən şansları dəyərləndirə bilmirik" - MÜSAHİBƏ

Misli Premyer Liqasının 25-ci turunda "Şamaxı " "Araz-Naxçıvan"a minimal hesab ilə məğlub oldu - 0:1.

Qarşılaşmadan sonra ev sahiblərinin üzvü Rüfət Abbasov Sport1.az-ın suallarını cavablandırdı.

Həmin müsahibəni təqdim edirik....

– Oyun haqqında təəssüratlarınız ?

– Bilirdik ki, çətin qarşılaşma olacaq. “Araz-Naxçıvan” çox yaxşı kollektivdir. İstəyirdik ki, 3 xal qazanaq, amma alınmadı. İlk qolu buraxdıq, bundan sonra şanslarımız oldu. Təəssüf ki, onları dəyərləndirə bilmədik.

– Komandanız liqada rəqiblərə qarşı təhlükəli epizodlar yaradır, lakin bunları qola çevirə bilmirsiniz. Səbəb nədir?

– Futbolda bəzən istədiyin alınır, bəzən isə yox. Bunun üzərində məşqlərdə çalışırıq. Bu problemi həll etmək üçün daha çox işləyəcəyik. İnanıram ki, daha yaxşı olacaq.

– “Araz-Naxçıvan”la artıq çempionatda 3 dəfə qarşılaşmısınız və qələbəniz yoxdur. Bu komanda sizin üçün ən çətin rəqiblərdəndir?

– Yox, biz hər oyuna eyni yanaşırıq. Rəqibin fərqi yoxdur. Dediyim kimi, epizodlarımız olur, sadəcə əlimizə düşən fürsətləri dəyərləndirə bilmirik.

– Oyunda zəif təsir bağışladınız. Öz performansınızdan nə dərəcədə razısınız?

- Futbolda bəzən yaxşı çıxış edirsən, bəzən isə eniş olur. Mən də çalışacağam ki, bundan sonra hər oyunda əlimdən gələni edim və daha yaxşı təsir bağışlayım

MƏHƏMMƏD HÜSEYNOV