"Milliyə çağırsalar da, çağırmasalar da, sağ olsunlar" – "Araz-Naxçıvan"ın üzvü

Misli Premyer Liqasının 25-ci turunda "Şamaxı" "Araz-Naxçıvan"a məğlub oldu - 0:1.

Qarşılaşmadan sonra qonaq komandanın üzvü Slavik Alxasov Sport1.az-ın suallarını cavablandırdı.

Həmin müsahibəni təqdim edirik...

–Oyun haqqında fikirləriniz?

– Qələbə qazandığımız üçün çox şadıq. “Şamaxı” səfərindən 3 xalla qayıdırıq. Bilirdik ki, çox çətin oyun olacaq. Çünki “Şamaxı” mübarizə aparan komandadır və son turlarda inamlı çıxış edirdi. Ona görə oyuna ciddi hazırlaşmışdıq. Elə matç idi ki, kim qol vursaydı, qalib tərəf o olacaqdı. Bunu da biz etdik və qələbə qazandıq.

– Meydanda rəqibə qarşı daha aqressiv görünürdünüz. Hansısa prinsipiallıq var idi?

– Xeyr! Hansısa xüsusi prinsipiallıq yox idi. Meydana qələbə qazanmaq üçün çıxmışdıq. Oyunumuzun 100 faizini göstərmək istəyirdik və bunun nəticəsində 3 xal qazandıq.

– Son oyunlarda performansınızda yüksəliş hiss olunur. Qarşıdan milli toplanış yaxınlaşır. Yığmaya dəvət alacağınızı düşünürsünüz?

– Çağırsalar da, çağırmasalar da, sağ olsunlar. Milli komanda hamı üçündür. Hər bir yerli futbolçu millidə oynamaq istəyər. Çağırsalar, çox sevinərəm. Çağırmasalar da, problem deyil. Meydanda olmasam belə, hər mənada dəstək olmağa hazıram.

– U-20 Dünya Çempionatı Özbəkistanla birgə Azərbaycanda keçiriləcək. Gənclərdən gözləntiniz nədir?

– Onlara uğurlar arzulayıram. Güman edirəm ki, qrup mərhələsini keçib, ölkəmizi layiqincə təmsil edəcəklər.

MƏHƏMMƏD HÜSEYNOV