Millinin məşqçisi İspaniyada nə gəzirdi? – ÖZÜ AÇIQLADI

Azərbaycanın U-21 millisinin köməkçi məşqçisi Fərid Namazov İspaniyada təcrübə proqramında iştirak edib.

Mütəxəssis UEFA “Pro” lisenziyası çərçivəsində La Liqa təmsilçisi “Real Betis”in düşərgəsində olub. Namazov mövzu ilə bağlı Sport1.az-a açıqlamasında bunları dedi:

“İlk növbədə göstərdiyiniz diqqət üçün təşəkkür edirəm. Bildiyiniz kimi, hazırda UEFA “Pro” lisenziyası üzrə təhsilimi davam etdirirəm. Lisenziyanın tələblərindən biri də Avropanın aparıcı komandalarından birində 7-8 günlük hazırlıq prosesini izləmək və təcrübə keçmək idi. Mən də top liqalardan birində çıxış edən komandanın düşərgəsində olmaq istəyirdim. Bunun üçün hazırda “Şamaxı” akademiyasının rəhbəri olan veteran futbolçumuz Vəli Qasımova müraciət etdim. Vəli müəllim “Real Betis”in keçmiş futbolçusudur və klubda böyük nüfuza sahibdir. Onun köməyi ilə klubla əlaqə saxladıq və sağ olsunlar, mənim orada təcrübə keçməyimə razılıq verdilər. Fevralın 21-dən martın 1-dək komandanın düşərgəsində oldum. Həmin müddətdə iki oyunu stadiondan izlədim və bu qarşılaşmalar arasındakı hazırlıq prosesini yaxından gördüm. Klubun düşərgəsinə daxil olanda komandanın səviyyəsi dərhal hiss olunurdu. İşə yanaşma çox yüksək idi. Əlbəttə, yüksək səviyyəli futbolçular öz yerində, amma məşqçi heyətinin işi də xüsusi diqqət çəkirdi”.

Mütəxəssis “Real Betis”də baş məşqçi işləyən Manuel Pelleqrini ilə görüşündən də danışdı:

“Orada olduğum müddətdə komanda “Sevilya” ilə derbiyə hazırlaşırdı. Buna baxmayaraq, baş məşqçi Manuel Pelleqrini və bütün məşqçi heyəti mənə çox isti münasibət göstərdi və suallarımı ətraflı cavablandırdı. Onunla əsasən komandanın idarə olunması və məşqçilik karyerasında qarşılaşdığı çətinliklər barədə danışdıq. Bundan əlavə, məşqlərin planlaşdırılması və iş bölgüsü ilə bağlı da bir neçə sual verdim. Orada diqqətimi çəkən əsas məqamlardan biri məşqçi heyətinin sayının çox olması idi. Bir məşq zamanı meydanda təxminən 16-17 nəfər məşqçi və texniki heyət üzvü fəaliyyət göstərirdi. Məşqə çıxmayan bəzi əməkdaşlar isə prosesi ofisdən canlı izləyirdi. Köməkçi məşqçilər, fiziki hazırlıq üzrə mütəxəssislər, analitiklər, həkimlər və qidalanma üzrə mütəxəssislərlə də görüşmək imkanım oldu. Onların məsuliyyət sahələri və baş məşqçi ilə iş prinsipləri barədə ətraflı məlumat əldə etdim. Futbolçuların məşqlərə peşəkar yanaşması da xüsusi diqqət çəkirdi. Ümumilikdə, yeni tendensiyaları yerində görmək baxımından çox faydalı bir səfər oldu. Bir daha sizin vasitənizlə Vəli Qasımova və onun İspaniyadakı keçmiş komanda yoldaşlarına göstərdikləri köməyə görə təşəkkürümü bildirirəm”.