"Qarabağ" Fransadan Zubirə əvəzləyici tapdı - İDDİA
“Qarabağ”ın mövsüm başa çatdıqdan sonra heyətinə qatacağı ilk futbolçunun kimliyi məlum olub.
Sport1.az Kipr mediasına istinadən xəbər verir ki, “Omoniya”nın vingeri Jali Muaddibin karyerasını Azərbaycanda davam etdirməsi böyük ölçüdə dəqiqləşib.
Məlumata görə, 25 yaşlı fransalı sol cinah oyunçusu artıq “Qarabağ”la bütün əsas şərtlər üzrə razılıq əldə edib. Hətta tərəflərin üç illik ilkin müqavilə imzaladığı da qeyd olunur.
Muaddib Azərbaycan çempionuna azad agent statusunda qoşulacaq. Buna səbəb isə onun “Omoniya” ilə mövcud müqaviləsinin mövsümün sonunda başa çatmasıdır.
“Qarabağ” rəhbərliyi Muaddibi həmyerlisi Abdullah Zubirin potensial əvəzləyicisi kimi nəzərdən keçirir.
Qeyd edək ki, Jali Muaddib 2019-cu ildə Fransanın U-19 millisində 3 oyuna çıxıb və həmin qarşılaşmalarda 1 qol vurub.
