"Neftçi"nin üzvündən etiraz: "Biabırçılıqdır" – MÜSAHİBƏ

Misli Premyer Liqasının 22-ci turunda "Şamaxı" doğma meydanda "Neftçi"ilə heç-heçə etdi - 2:2.

Sport1.az xəbər verir ki, qarşılaşmadan sonra qonaqların üzvü Elvin Bədəlov jurnalistlərin suallarını cavablandırdı.

Həmin müsahibəni təqdim edirik... 

– Hakimlər Komitəsi səhvlərlə bağlı açıqlamalar verir, amma nəticə dəyişmir. Xal itirirsiniz, avrokubok hədəfiniz var. Bu qərarlar komandaya necə təsir edir?

– Çox ciddi məsələdir. Əlbəttə, təsir edir. Bu hal birinci dəfə yaşanmır. Haradasa minimum 9 xalımız gedib. Çox üzücü haldır. Açığı, fikir bildirmək çətindir, sadəcə biabırçılıqdır.

– Növbəti tur əsas rəqiblərinizdən biri olan "Turan-Tovuz" ilə qarşılaşacaqsınız. Oyun barədə nə deyə bilərsiniz?

 – Avrokuboklar uğrunda vəsiqə üçün əsas rəqiblərimiz üzərində qələbə qazansaq, məqsədimizə çata bilərik. Bunun üçün əlimizdən gələni edəcəyik ki, istəyimizə nail olaq.

– Bu qarşılaşmanı 6 xallıq oyun adlandırmaq olar? Çünki "Sumqayıt" ilə xal fərqini artıra, "Araz-Naxçıvan" ilə isə fərqi bərabərləşdirə bilərdiniz...

 – Bəli, adlandırmaq olar. Amma "Şamaxı" səfərindən inanmıram ki, kimsə rahat qələbə ilə qayıtsın. Bu oyunda qələbə haqqımız idi. Növbəti matçlarda qalib gəlsək, inşallah bu görüşü unudub, daha yuxarı pillələrə qalxa bilərik.

– İki həftə oynamamağınız bugünkü performansa təsir etdimi?

 – İlk hissədə təsiri hiss olundu. Oyundakı üstünlüyümüz zəif idi. Ağır səfər, hava şəraiti də təsirini göstərdi. Amma ikinci hissədə toparlandıq. Bu qarşılaşmada qalib tərəf biz olmalı idik. Təəssüf ki, futbolda belə hallar olur.

MƏHƏMMƏD HÜSEYNOV