Pəhləvanla şeytanın nağılı - KÖŞƏ

Qədim zamanlarda bir pəhləvan var imiş.

O qədər güclü, o qədər bacarıqlı, o qədər nəhəng imiş ki, onun kürəyini yerə vuran, dizini əyən bir pəhləvan yox imiş yer üzündə. Bir də o zamanlarda bir şeytan var imiş. Şeytan xalqa zülm edirmiş. Ordular, qoşunlar şeytanın üstünə getsə də, hamıya qalib gələr, heç kimə uduzmazmış. 

Bir gün xalq yığılır, gedir pəhləvana xahiş, yalvar-yaxar edir ki, bizi bu şeytandan qurtarsan, elə sən qurtaracaqsan. Gəl, bu şeytanla savaş, bizi xilas et. 

Pəhləvanın xalqa yazığı gəlir, onların alqışı, onların xeyir-duası ilə yola çıxır gedir şeytanı axtarmağa. Axtarır, axtarır, nəhayət ucqar bir vadidə, bir dağın ətəyində şeytanı tapır. Deyir ki, xalqı incidirsən, insanlara əziyyət verirsən, gərək səni öldürüm. Şeytan deyir ki, xalqdan sənə nə, sənlə işim yoxdu, sənin də mənlə işin olmasın. Pəhləvan da deyir ki, yox, gərək savaşaq. Nəysə, tutaşırlar. Bir az o buna güc gəlir, bir az bu ona. O bunu tutur, bu onu dartır, nəhayətində Pəhləvan şeytanın dizini yerə gətirir, kürəyini yerə basır, xəncərini çıxarıb başını kəsmək istəyəndə şeytan deyir ki, əl saxla. Sən məni öldürmə, xalqı da incitməyəcəm, sənə də hər gün bir manat pul verəcəm. Hər səhər oyananda yastığının altında pulu tapacaqsan. Pəhləvan bir az düşünür - daşınır, bir az fikrə gedir, axırda razılaşır. Şeytanı buraxır, özü də evinə dönür.

Nağıl dili yüyrək olar, aradan bir xeyli zaman keçir. Pəhləvan hər səhər yastığının altında 1 manatı görür, xalq da yaddan çıxır, millət də. Gəl zaman, get zaman, bir gün Pəhləvan oyananda görür ki, yastığın altı boşdur, manat yoxdur. Düşünür ki, yəqin unudub. O biri gün yenə pul olmur, növbəti gün yenə, bir sonrakı gün yenə. Bu minvalla 7 gün səbr edir, nəhayət qərara alır ki, gedib şeytanı tapsın. 

Yola çıxır, axtarır, gəzir yenə eyni ucqar vadidə şeytanla rastlaşır. Deyir, ey şeytan sən mənim pulumu vermirsən, bu dəfə səni öldürəcəm. Yenə tutaşırlar. Elə ilk həmlədə şeytan bunu yıxır yerə. Başını kəsmək istəyəndə Pəhləvan deyir ki, ey şeytan, necə olur ki, keçən dəfə mən sənə qalib gəlmişdim, amma indi sən elə ilk dəfədən yendin məni? 

Şeytan cavab verir ki, ey Pəhləvan, sən birinci dəfə gələndə arxanda elin gücü, xalqın xeyir-duası, millətin dəstəyi var idi, onların dərdi üçün gəlmişdin, ona görə də qalib gəldin. Amma indi, bu dəfə bir manat üçün döyüşürsən. Məqsədin, istəyin ancaq qazancdı. Ona görə də uduzdun... 

O gün Qurban Qurbanov hakim idarəçiliyindən, Qubadakı meydançanın yararsızlığından, "Qarabağ"a qarşı verilən açıqlamalardan, "Nyukasl"a qarşı yaxşı hazırlaşa bilməməkdən və s. şikayət edib. Özü də çox əsəbi, aqressiv, heç vaxt görmədiyimiz sərt tonda. 

Niyəsə bu nağıl yadıma düşdü...

UĞUR