"Neftçi" "Qarabağ"ın təklifini qəbul etmədi
Misli Premyer Liqasının XXI turunda keçirilməli olan "Neftçi" - "Qarabağ" matçı təxirə salınmayacaq.
Bu məlumat Sport1.az-a Ağdam təmsilçisinin mətbuat xidməti tərəfindən verilib.
Həmin informasiyanı təqdim edirik:
“Misli Premyer Liqasının XXI turu çərçivəsində fevralın 21-də keçirilməsi planlaşdırılan “Neftçi” - “Qarabağ” oyunu təxirə salınmayacaq. UEFA Çempionlar Liqasının pley-off mərhələsində “Nyukasl"la qarşılaşma öncəsi Premyer Liqa matçının təxirə salınması üçün Peşəkar Futbol Liqasına müraciət etmişdik. "Neftçi" bu təklifi rədd edib. Bu səbəbdən də görüş baş tutacaq".
Qeyd edək ki, “Qarabağ” fevralın 21-də saat 19:00-da “Neftçi” ilə üz-üzə gələcək. Komanda oyundan bir gün sonra İngiltərəyə yollanaraq “Nyukasl”la keçiriləcək görüşə hazırlaşacaq.
