“Daha güclü qayıtmaq lazımdır” – Kadi

“Qarabağ”ın yarımmüdafiəçisi Kadi Borges uzun fasilədən sonra meydana qayıtdı.

Sport1.az xəbər verir ki, Misli Premyer Liqasının 18-ci turunda “Turan Tovuz”la oyunda (1:0) şans qazanan braziliyalı futbolçu qarşılaşmadan sonra fikirlərini bölüşdü.

Kadi rəqibin oyun üslubuna toxunub: “Çətin oyun olacağını gözləyirdik və elə də oldu. Rəqib çox aqressiv komandadır, birəbir mübarizələrdə yaxşı futbolçuları var. Xüsusilə də standart vəziyyətlərə çox üstünlük verirlər. Düşünürəm ki, qarşımıza qoyulan məqsədə çatdıq və istədiyimiz 3 xalı qazandıq”.

O, zədədən sonrakı dönəmi də yada salıb: “Zədəli olduğum dövr mənim üçün olduqca çətin keçdi. Amma bu, hər bir idmançının karyerasında qarşılaşdığı mərhələlərdən biridir. Əsas odur ki, bu periodu düzgün keçəsən. İndi həm psixoloji, həm də fiziki baxımdan daha güclü qayıtmaq lazımdır. Düşünürəm ki, bunun öhdəsindən gələ biləcəyəm”.

Çempionlar Liqasının pley-off mərhələsində “Nyukasl”la keçiriləcək oyunlar barədə danışan Kadi isə belə deyib: “Məncə, rəqibi keçib-keçməyəcəyimizi düşünməyə ehtiyac yoxdur. Sadəcə meydana çıxıb mübarizə aparmaq lazımdır. Digər məsələlərin artıq alınıb-alınmayacağı Allahın əlindədir”.