"Qazanmağa və qazandığımızdan düzgün istifadə etməyə çalışırıq" - "Neftçi"nin baş icraçı direktorundan iddialı AÇIQLAMA

Misli Premyer Liqasının 18-ci turunda "Neftçi" səfərdə "Araz-Naxçıvan"ı 4:0 hesabı ilə məğlub etdi.

Sport1.az xəbər verir ki, oyundan sonra "ağ-qaralar"ın baş icraçı direktoru Cenk Sumer jurnalistlərin suallarını cavablandırdı.

Həmin müsahibəni təqdim edirik...

- "Araz-Naxçıvan"la oyunda qazanılan inamlı qələbəni klub rəhbərliyi olaraq necə qiymətləndirirsiniz?

 - Meydanda arzu etdiyimiz "Neftçi"ni gördük. Rəqibimiz asan deyildi, həm də səfərdə oynayırdıq. Onların hücum xəttində çox güclü oyunçular var. Komandamız nizam-intizamı qorudu. Oyunun sonuna qədər rəqibə təzyiq etməyi dayandırmadı.

– "Neftçi"nin son zamanlardakı nəticələri ilə bağlı nə deyə bilərsiniz?

 - Çətin dövrdən keçirik. Əvvəlki alışqanlıqlardan fərqli olaraq yeni şeylər etməliyik. Bunun üçün ciddi dəyişikliklər həyata keçiririk. Artıq məşqçi oyunçuları daha yaxşı tanıyır. Futbolçularımız da öz potensiallarının fərqinə varır. 

– "Zirə" ilə oyunda xal itirdiniz. Həmin matçı necə dəyərləndirirsiniz?

 - "Zirə" ilə oyunumuz çətin keçdi. İstədiyimiz nəticəni yavaş-yavaş əldə edəcəyik. Komanda inkişaf edəcək. Bir oyunla inkişafdan bəhs etmirik. Əvvəlcədən nəticəni müəyyən etməyəcəyik. Yolumuz hələ uzun, görəcəyimiz çox iş var.

– Akademiyanın inkişafı və transferlərlə bağlı nə deyə bilərsiniz?

 - Bilirsiniz ki, işimiz yalnız meydanda deyil, kənarda da çoxdur. Bazamızın və akademiyamızın inkişafına diqqət yetiririk. Hər şeyi düzgün planlamaq istəyirik. Büdcəmizi nəzərə alaraq iş görürük. Qazanmağa və qazandığımızdan düzgün istifadə etməyə çalışırıq. Hər şey istədiyimiz kimi olacaq.

MƏHƏMMƏD HÜSEYNOV