“Qol ötürməsi verməkdən daha çox həzz alıram” “Sabah”ın “sehrbaz”ı danışdı

Misli Premyer Liqasının 18-ci turunda “Zirə” ilə səfər oyunundan 3:1 hesablı qələbə ilə qayıdan “Sabah”da matçın əsas fiqurlarından biri Aleksey İsayev olub.

Sport1.az xəbər verir ki, yarımmüdafiəçi klubun mətbuat xidmətinə açıqlamasında qarşılaşmada etdiyi 3 məhsuldar ötürməyə və azarkeşlərin ona verdiyi “sehrbaz” ləqəbinə belə münasibət bildirib: “Mən sadəcə Sibirdən olan sadə oğlanam. Təşəkkür edirəm. Əsas odur ki, komanda qazandı. Hər zaman komanda yoldaşıma ötürmə verməyə şad oluram. Deyəsən, bundan qol vurmaqdan daha çox həzz alıram. Göründüyü kimi, məndə ötürmə vermək qol vurmaqdan daha yaxşı alınır. Hər şey komanda üçündür”.

İsayev komanda daxilindəki ab-havanı da xüsusi vurğulayıb: “Hər gün məşq edirik, məşqçinin tapşırıqlarını yerinə yetiririk, bir sözlə, dayanmadan çalışırıq. Kollektivimiz əladır, aramızda əla anlaşma var. Bazada hamımız birlikdə ünsiyyət qururuq. Bizdə hansısa qruplaşmalar, ayrılıqlar yoxdur. Çalışırıq ki, bir-birimizdən fransız, Azərbaycan, ispan, rus dillərində sözlər öyrənək. Biz bir ailə kimi olmağa çalışırıq”.