Arbeloa “Real”da ilk gördüyünü açıqladı: “Hər kəsin işə yanaşması diqqətimi çəkdi”

“Real”ın baş məşqçisi Alvaro Arbeloa İspaniya çempionatında “Vilyarreal” üzərində 2:0 hesablı qələbədən sonra komandasının oyununu dəyərləndirib.

Sport1.az xəbər verir ki, mütəxəssis klub televiziyasına açıqlamasında futbolçuların fədakarlığını xüsusi vurğulayıb və hücum xəttinin liderlərinin roluna diqqət çəkib:

“Komandaya gələndən bəri ilk gördüyüm şey hər kəsin oyuna qoşulması, zəhməti və işi oldu. Bu meydanda qələbənin böyük dəyəri var və bu nəticə uşaqların əməyinin sayəsində əldə edilib. Onların səviyyəsi yüksəkdir və bizdən nə istədiyimizi göstərən kiçik göstərişlər belə yaxşı nəticə üçün kifayətdir. Zaman keçdikcə hər şey daha da asan olacaq.

Mbappe və Vinisius çox “partlayıcı”dır. Çalışırıq ki, onlar topu mümkün qədər tez-tez alsınlar: Vinisiusun cinahdan keçid edə biləcəyi, Kilianın isə boş zonalardan yararlana biləcəyi vəziyyətlər axtarırıq. Onların bu formada olmasına çox sevinirik. Onlar pressinqə birinci başlayır və yarımmüdafiəçilərə kömək edirlər. Bu cür həmrəylik bizə çox lazımdır və sevinirik ki, onların mükafatı vurulan qollar şəklində gəlir”.

Qeyd edək ki, “Real” 21 turdan sonra 51 xalla La Liqanın turnir cədvəlinə başçılıq edir.