"Neftçi" üçün yubiley oyunu
Misli Premyer Liqasının XVII turu “Neftçi” üçün statistik baxımdan əlamətdar olub.
Sport1.az PFL-ə istinadən xəbər verir ki, “ağ-qaralar” evdə “Zirə” ilə keçirilən görüşdə qolsuz heç-heçəyə razılaşıb – 0:0.
Bu nəticə Bakı təmsilçisinin Azərbaycan çempionatları tarixində 0:0 hesabı ilə başa çatan 100-cü matçı olub. Paytaxt klubu qolsuz heç-heçələrin sayında yalnız “Qarabağ”dan geri qalır. Ağdam komandasının hesabında 107 belə qarşılaşma var.
Qeyd olunur ki, “Neftçi” ilk dəfə 1993-cü il martın 6-da “Turan”la ev oyununda 0:0 hesablı nəticə qeydə alıb. Cari mövsümdə isə bu, “ağ-qaralar”ın dördüncü qolsuz oyunu olub.
Statistikaya əsasən, “Neftçi” indiyədək 49 səfər matçını, 1 qarşılaşmanı neytral meydanda və 50 ev görüşünü 0:0 hesabı ilə tamamlayıb.
