Debüt edən futbolçu fərqləndi, “Qarabağ” xorvatları məğlub etdi
Türkiyədə təlim-məşq toplanışını davam etdirən “Qarabağ” növbəti yoxlama görüşünü də qələbə ilə başa vurub.
Sport1.az xəbər verir ki, Qurban Qurbanovun rəhbərlik etdiyi Ağdam təmsilçisi Xorvatiyanın “Osiyek” klubu ilə qarşılaşıb. Matç Azərbaycan çempionunun 3:1 hesablı qələbəsi ilə yekunlaşıb.
“Qarabağ”ın qollarını 49-cu dəqiqədə Musa Qurbanlı, 57-ci dəqiqədə Aleksey Kaşuk və 90+3-cü dəqiqədə Abbas Hüseynov vurub. Son qol epizodunda diqqətçəkən məqam isə 19 yaşlı Bəhruz Qurbanlının assisti olub. Gənc futbolçu bu oyunla “Qarabağ”ın əsas komandasında debüt edib və məhsuldar ötürmə ilə yadda qalıb.
“Köhlən atlar” bu gün hazırlıq prosesi çərçivəsində daha bir yoxlama matçı keçirəcək. Komanda saat 19:00-da Polşanın “Zaqlebye” klubu ilə üz-üzə gələcək.
Qeyd edək ki, “Qarabağ” əvvəlki yoxlama oyununda Özbəkistanın “Neftçi” komandasını 5:0 hesabı ilə məğlub etmişdi.
