“Qarabağ” Antalyada şou göstərdi – Özbəkistan çempionuna 5 cavabsız qol

Türkiyənin Antalya şəhərində qış təlim-məşq toplanışını davam etdirən “Qarabağ” ilk yoxlama oyununu keçirib.

Sport1.az xəbər verir ki, Ağdam təmsilçisi hazırlıq görüşündə Özbəkistan çempionu “Neftçi” (Fərqanə) ilə üz-üzə gəlib. Qarşılaşma “Qarabağ”ın tam üstünlüyü şəraitində keçib və 5:0 hesablı qələbə ilə başa çatıb.

Qollara Marko Yankoviç (3, 29), Andrade (8), Joni Montiel (10) və Nəriman Axundzadə (71) imza atıblar.

Qeyd edək ki, “Qarabağ” Misli Premyer Liqasında qış fasiləsinə 36 xalla ikinci pillədə yollanıb. Rəqib “Neftçi” isə 2025-ci il mövsümündə Özbəkistan Super Liqasının qalibi olub.

Ağdam klubu Antalya toplanışı çərçivəsində daha bir yoxlama oyunu keçirəcək. Komanda yanvarın 16-da Polşanın “Zaqlebie Lubin” klubu ilə qarşılaşacaq.