Polşadan “Qarabağ”ın üzvünə təklif var

“Qarabağ”ın qapıçısı Mateuş Koxalski karyerasını vətənində davam etdirə bilər.

Sport1.az xəbər verir ki, Polşanın “Vidzev” klubu 25 yaşlı qolkiperlə yaxından maraqlanır. Lodz təmsilçisinin Koxalskiyə marağı yeni deyil. Klub ötən yay da futbolçunu heyətinə qatmaq istəyib, lakin həmin vaxt bu, baş tutmamışdı.

Bu müddət ərzində Mateuş Koxalskinin transfer dəyəri xeyli yüksəlib. Buna baxmayaraq, “Vidzev” tərəfi bu məqamı keçid üçün ciddi maneə saymır. Son günlər qapıçının adı Almaniyanın “Borussiya” (Dortmund) klubu ilə də hallansa da, bu transferin reallaşması gözlənilmir.

Qeyd edək ki, Koxalskinin “Qarabağ”la müqaviləsi 2027-ci ilin yayına qədər qüvvədədir. Sözləşmədə əlavə 12 aylıq uzatma bəndi də yer alır.

Xatırladaq ki, polşalı qolkiper 2024-cü ilin avqustunda “Stal”dan “Qarabağ”a təxminən 900 min avro qarşılığında transfer olunub.