“Qarabağ” bu futbolçu uğrunda “Trabzonspor”la yarışır

“Qarabağ” heyətini bolqar futbolçu ilə gücləndirə bilər.

Sport1.az xəbər verir ki, jurnalist Ben Ceykobsun yaydığı məlumata əsasən, “köhlən atlar” 19 yaşlı vinger Kristian Balovla maraqlanır. Gənc futbolçunun xidmətində “Qarabağ”la yanaşı “Anderlext”, “Trabzonspor” və “Rakuv”, “Ludoqorets” klubları da maraqlıdır.

Sonuncular Balov üçün rəsmi təklif göndərsə də, Sofiya təmsilçisi bu variantı qəbul etməyib. Futbolçunun transfer dəyəri 2 milyon avrodan aşağı qiymətləndirilir ki, bu da “Qarabağ” üçün keçidi real seçimlərdən birinə çevirir.

Qeyd edək ki, Kristian Balovun “Slaviya” ilə müqaviləsi 2027-ci ilin yayına qədər qüvvədədir. O, 2024-cü ilin iyulunda Sofiya klubuna qoşulub və cari mövsümdə efbet Liqasında 19 oyunda 2 qol vurub, 3 məhsuldar ötürmə edib. Vinger Bolqarıstanın U-21 millisində də 7 matçda forma geyinib. “Transfermarkt” portalında futbolçunun bazar dəyəri 500 min avro göstərilir.