Qazaxıstan mətbuatı “Neftçi”nin mövqeyinə təəccübləndi

Qazaxıstan mətbuatı “Neftçi”nin turnir cədvəlindəki mövqeyinə təəccübünü gizlətməyib.

Sport1.az xəbər verir ki, yerli “Kayrat” klubunun BƏƏ-nin Əbu-Dabi şəhərində keçiriləcək qış təlim-məşq toplanışı çərçivəsində qarşılaşacağı rəqiblərdən bəhs edən Qazaxıstan mediası Bakı təmsilçisinə də xüsusi yer ayırıb.

Vurğulanıb ki, “Kayrat” yanvarın 9-da ilk yoxlama oyununu “Neftçi”yə qarşı keçirəcək. Qazaxıstanlı jurnalistlər Azərbaycan çempionatının doqquzqat qalibi olan klubun hazırda 12 komanda arasında aşağı pillələrdə qərarlaşmasını gözlənilməz hesab ediblər. Qeyd olunub ki, “Neftçi”yə bir neçə il əvvəl Moldova “Şerif”ini UEFA Çempionlar Liqasının qrup mərhələsinə çıxaran təcrübəli ukraynalı mütəxəssis Yuri Vernidub rəhbərlik edir.

Yazıda Bakı klubunun heyətinin kifayət qədər iddialı olduğu bildirilib. Komandada Azərbaycanla yanaşı Monteneqro, Benin, Kamerun və Venesuela milli komandalarının üzvlərinin çıxış etdiyi qeyd edilib. Bu baxımdan “Neftçi”nin çempionatdakı mövqeyi Qazaxıstan tərəfi üçün sual doğurub.

Xüsusilə kamerunlu hücumçu Vensan Abubakarın üzərində dayanılıb. Onun milli komanda karyerasında 116 oyunda 45 qol vurduğu, “Portu” və “Beşiktaş” kimi klublarda forma geyindiyi xatırladılıb. Oktyabr ayında “Neftçi”yə transfer olunan təcrübəli forvardın bütün turnirlərdə keçirdiyi 10 matçda 5 dəfə fərqləndiyi qeyd edilib.

Məqalədə Abubakarın Afrika Millətlər Kubokunda iştirak etməməsinin səbəblərinə də toxunulub. Kamerun futbolunda baş verən daxili qalmaqallar fonunda hücumçunun yığmaya çağırılmadığı, nəticədə isə 9 yanvarda Mərakeşlə oyun əvəzinə “Kayrat”la yoldaşlıq görüşündə iştirak edəcəyi bildirilib.

Bundan əlavə, “Neftçi”nin heyətində Azərbaycan millisinin kapitanı Emin Mahmudovun da yer aldığı xatırladılıb. Qapıçı mövqeyində isə Qazaxıstan azarkeşlərinə tanış olan Emil Balayevin adı çəkilib. Lakin onun əsas heyətdə yer almadığı, Kenan Piriçlə rəqabətdə geri qaldığı vurğulanıb.

Sonda qeyd olunub ki, “Neftçi” mövsümün ikinci yarısına ciddi şəkildə hazırlaşır və yanvarın 23-də 2026-cı ilin ilk rəsmi oyununda “Zirə”ni qəbul edəcək.