Alonso: “Qarsiya akademiya yetirməsinin nə demək olduğunu göstərir”

“Real”ın baş məşqçisi Xabi Alonso hücumçu Qonsalo Qarsiyanın İspaniya çempionatının 18-ci turunda “Betis”ə qarşı ev oyununda (5:1) etdiyi het-triki şərh edib.

Sport1.az xəbər verir ki, ispaniyalı mütəxəssis gənc futbolçunun çıxışını yüksək qiymətləndirib.

“Qonsalo üçün bu, əsl xəyal oyunu idi — “Santyaqo Bernabeu”da, ilk mövsümündə het-trik etdi. O, qol vurmağı çox istəyirdi. Onun gündəlik zəhmətinə, həm oynayanda, həm də oynamayanda göstərdiyi münasibətə görə çox sevinirəm. Qonsalo akademiya yetirməsinin nə demək olduğunu göstərən ideal nümunədir. Onu ürəkdən təbrik edirəm və eyni ruhda davam etməsini arzulayıram”, — deyə Alonso mətbuat konfransında bildirib.

Qeyd edək ki, 21 yaşlı Qonsalo Qarsiya 2025/26 mövsümündə bütün turnirlərdə 18 oyunda meydana çıxıb, 3 qol vurub və 1 məhsuldar ötürmə edib.