“Araz-Naxçıvan”da yeni baş məşqçi – RƏSMİ

Andrey Demçenko “Araz-Naxçıvan”ın baş məşqçisi təyin olunub.

Sport1.az xəbər verir ki, bu barədə Muxtar Respublika təmsilçisinin mətbuat xidməti məlumat yayıb.

Ukraynalı mütəxəssislə imzalanan müqavilə “5 ay + 1 il” müddətini əhatə edir. Məşqçilik fəaliyyətinə 2011-ci ildə başlayan Demçenko indiyədək Ukraynada “İmeks”, “Metallurq” (Zaporojye), “Veres”, “Lvov”, “Metallist 1925” və “Bukovina” klublarını çalışdırıb. O, həmçinin Özbəkistanın “Obod”, Gürcüstanın “Dila” və “Dinamo” (Batumi) komandalarına rəhbərlik edib. 50 yaşlı mütəxəssis Bakıya gəlməzdən əvvəl Qazaxıstanın “Jenis” klubunun baş məşqçisi olub. Onun köməkçiləri ilə bağlı əlavə məlumatın daha sonra açıqlanacağı bildirilib.

Qeyd edək ki, dekabrın 21-də “Şamaxı” ilə oyundan sonra istirahətə buraxılan “Araz-Naxçıvan” yanvarın 5-də məşqləri bərpa edəcək. Komanda qış fasiləsini Bakıda keçirəcək və hazırlıq prosesi çərçivəsində 3 yoxlama oyunu planlaşdırılıb. “Qırmızı-ağlar” yanvarın 9-da klubun əvəzedici komandası, yanvarın 14-də isə “Qəbələ” ilə üz-üzə gələcək. Yanvarın 18-də keçiriləcək görüşün rəqibi barədə məlumat daha sonra veriləcək.