“Qarabağ”ın qarşılaşacağı rəqiblər bəlli oldu

“Qarabağ”ın Türkiyədə keçiriləcək qış təlim-məşq toplanışı çərçivəsində qarşılaşacağı rəqiblər bəlli olub.

Sport1.az xəbər verir ki, Ağdam təmsilçisi hazırlıq prosesinin ikinci mərhələsini yanvarın 10-dan 17-dək Türkiyənin Belek bölgəsində yerləşən “Gloria Sports Arena”da keçirəcək.

Toplanış müddətində “Qarabağ” iki yoxlama oyunu planlaşdırıb. Komanda yanvarın 12-də Özbəkistanın “Neftçi” (Fərqanə) klubu ilə saat 17:00-da (Bakı vaxtı ilə 18:00), yanvarın 16-da isə Polşanın “Zaqlebie Lubin” kollektivi ilə saat 18:00-da (Bakı vaxtı ilə 19:00) üz-üzə gələcək.

Qeyd edək ki, Ağdam klubu yeni ildə ilk rəsmi oyununu yanvarın 21-də UEFA Çempionlar Liqasının Liqa mərhələsi çərçivəsində Almaniya təmsilçisi “Ayntraxt”a qarşı keçirəcək.