Mbappenin klubu “Mançester Siti”nin keçmiş futbolçusuna tapşırıldı
Fransada diqqətçəkən məşqçi təyinatı baş tutub.
Sport1.az xəbər verir ki, yığmanın sabiq üzvü Qael Klişi “Kan”ın baş məşqçisi vəzifəsinə gətirilib. Məlumat klubun mətbuat xidməti məlumat yayıb.
Bu təyinatın əsas diqqətçəkən tərəflərindən biri “Kan”ın əsas səhmdarının “Real Madrid”in hücumçusu Kilian Mbappe olmasıdır. Məhz bu detal Qael Klişinin baş məşqçi postuna gətirilməsini Fransa futbol gündəminin əsas mövzularından birinə çevirib.
Xatırladaq ki, Klişi futbolçu karyerası dövründə “Arsenal” və “Mançester Siti” kimi klublarda çıxış edib. Aktiv karyerasını başa vurduqdan sonra “İstanbul Başakşehir” və “Servett”də oyunçu-məşqçi funksiyasını yerinə yetirib. Daha sonra isə Tyerri Anrinin məşqçi heyətində Fransa U-21 millisində çalışıb və Paris-2024 Yay Olimpiya Oyunlarında gümüş medal qazanıb.
Onu da əlavə edək ki, Qael Klişi futbolçu kimi ilk peşəkar addımlarını məhz “Kan”da atıb. Hazırda komanda Fransa üçüncü divizionunda mübarizə aparır.
