Gəncə şəhər stadionu bu tarixdə istifadəyə veriləcək – Nazir AÇIQLADI

Gəncə şəhər stadionunun yaxın vaxtlarda istifadəyə verilməsi planlaşdırılır.

Sport1.az xəbər verir ki, arenanın aprel–may aylarında “Kəpəz” klubunun ixtiyarına verilməsi gözlənilir. Bu barədə gənclər və idman naziri Fərid Qayıbov jurnalistlərə açıqlamasında danışıb.

Nazir stadionun hazır vəziyyətə gətirilməsinin birbaşa hava şəraiti ilə bağlı olduğunu bildirib və konkret tarix açıqlamağın çətinliyini vurğulayıb:

“Dəqiq tarix demək bir az çətindir. Amma yəqin ki, bu, aprel-may aylarına təsadüf edəcək və stadion oyunlar üçün hazır vəziyyətə gətiriləcək. Bu, hava şəraitindən asılı olan məqamdır. Biz gözləməliyik. Gəncə şəhər stadionu müasir standartlara cavab verir. Orada azarkeşlər və futbolçular üçün yaxşı şərait var. Futbol oynamaq, izləmək üçün hər şey yaxşı səviyyədə qurulub. Azərbaycanda ən yaxşı futbol stadionlarından biridir. Biz də orada oyunların tez olmasını istəyirik. Amma aprel–may aylarını gözləməliyik. Komandanın həmin vaxt orada oynaya bilməsi üçün çalışırıq”.