"Qarabağ"ın bu futbolçularının qiymətləri azaldı - SİYAHI

“Qarabağ”ın bir neçə futbolçusunun bazar dəyərində geriləmə qeydə alınıb.

Sport1.az xəbər verir ki, “Transfermarkt” portalının son yenilənməsinə əsasən, Ağdam təmsilçisinin heyətində bir sıra oyunçunun qiyməti aşağı düşüb. Ən ciddi azalma qapıçı mövqeyində qeydə alınıb. Fabian Buntiçin bazar dəyəri 700 min avrodan 500 minə düşüb. Alman əsilli xorvat qolkiper cari mövsümdə Premyer Liqada cəmi iki qarşılaşmada forma geyinib.

Müdafiə xəttində çıxış edən Bədavi Hüseynovun qiymətində isə uzun müddətdir davam edən azalma tendensiyası diqqət çəkir. 2020-ci ildə bazar dəyəri 1 milyon avro olan təcrübəli futbolçunun hazırkı göstəricisi 125 min avrodur. O, bu mövsüm səkkiz oyunda meydana çıxıb.

Digər müdafiəçi Abbas Hüseynov da dəyər itkisi yaşayanlar sırasındadır. Cəmi iki qarşılaşmada şans qazanan oyunçunun bazar qiyməti 100 min avro azalaraq 500 minə düşüb.

Yay “transfer pəncərəsi”ndə İspaniyanın “Rayo Valyekano” klubundan komandaya cəlb edilən yarımmüdafiəçi Joni Montielin də qiymətində eniş var. Altı oyunda forma geyinən ispaniyalının hazırkı dəyəri 700 min avro olaraq göstərilir.

Hücum xəttində çıxış edən Musa Qurbanlının bazar qiyməti də son yenilənmədə aşağı düşüb. 23 yaşlı forvardın dəyəri 50 min avro azalaraq 700 minə enib. Gənc futbolçu mövsüm ərzində səkkiz matçda 3 qol vurub, 2 məhsuldar ötürmə ilə yadda qalıb.

Komandanın kapitanı Abdullah Zubirin də qiymətində azalma müşahidə olunur. Sol cinah vingerinin bazar dəyəri 450 min avrodan 400 minə düşüb. O, cari mövsümdə 15 oyunda iştirak edib.

Dəyər itirənlər arasında hücumçu Ramil Şeydayev də yer alır. Altı qarşılaşmada meydana çıxan futbolçunun hazırkı bazar qiyməti 700 min avro təşkil edir. Onun yay transfer dövründəki dəyəri isə 800 min avro idi.

MİRZƏ S.