“Vinisius bəzən səhv edir, amma onu olduğu kimi qəbul etmək lazımdır”

“Real Madrid”in sabiq yarımmüdafiəçisi Lukas Vaskes keçmiş komanda yoldaşı Vinisius Juniorun oyun üslubu və xarakteri ilə bağlı fikirlərini bölüşüb.

Sport1.az xəbər verir ki, ispan futbolçu braziliyalı hücumçunun meydandakı davranışlarının onun futbol fəlsəfəsi ilə birbaşa əlaqəli olduğunu bildirib. Vaskesin sözlərinə görə, Vinisius məsuliyyətinin fərqində olan və böyük ürəyə sahib bir oyunçudur:

“Vini nə etməli olduğunu anlayacaq qədər yetkindir. O, karyeram boyunca rastlaşdığım ən yaxşı insanlardan biridir və çox böyük ürəyi var. Onun temperamentinin oyunu ilə üst-üstə düşdüyünü düşünürəm. Meydanda bir burulğan kimidir – yorulmur, daim rəqibə hücum edir, müdafiəni yarmağa çalışır”.

Təcrübəli futbolçu əlavə edib ki, gənc hücumçuya anlayışla yanaşmaq lazımdır:

“Ona düşən məsuliyyəti hiss etməyi sevir. Bəzən səhvlər edir, amma bunu hamımız edirik. Əsas odur ki, ona hörmətlə yanaşaq və olduğu kimi qəbul edək”.