Ronaldoya qırmızı vərəqə göstərən hakim “Real” oyunlarından kənarlaşdırıldığını açıqladı

La Liqanın sabiq hakimi Xavyer Estrada Fernandes açıqlaması ilə diqqət çəkib.

Sport1.az xəbər verir ki, təcrübəli referi Madrid “Real”ının sabiq hücumçusu Kriştiano Ronaldoya qırmızı vərəqə göstərdikdən sonra iki il müddətinə “kral klubu”nun oyunlarına təyinat almadığını bildirib.

Fernandesin sözlərinə görə, hadisə 2009/10 mövsümündə La Liqanın 13-cü turunda keçirilən “Real” – “Almeriya” (4:2) qarşılaşmasında baş verib. Həmin oyunun 88-ci dəqiqəsində Ronaldo meydandan qovulub.

Sabiq hakim yaşananları belə xatırlayıb: “2009-cu ildə Kriştiano Ronaldonu meydandan kənarlaşdırdıqdan sonra təxminən iki il “Real”ın oyunlarını idarə etmədim. Qarşılaşmadan sonra evə qayıdan kimi Hakimlər Komitəsinin rəhbəri Sançes Arminiodan zəng gəldi. O, bu epizodun bütün idman mətbuatının manşetlərinə çıxacağını dedi və bunun nəticəsiz qalmayacağına işarə vurdu”.

Fernandes futbolun görünməyən tərəflərinə də toxunub: “Futbolda qaranlıq tərəf mövcuddur. Bəziləri bu reallığı bilmir, bəziləri isə bilmək istəmir. Həmin tərəfdən öz maraqları üçün istifadə edənlər də var”.

Qeyd edək ki, Fernandes bu fikirləri “Sport.es” nəşrinə verdiyi açıqlamada və şəxsi “yutub” kanalında səsləndirib.