“İmişli”dən nümunəvi addım: fiziki məhdudiyyətli gənci sevindirdi – FOTO, VİDEO

“İmişli” klubu fiziki məhdudiyyətli gənc Hüseyn İsmayılovun ailəsini ziyarət edib və ona xüsusi hədiyyələr təqdim edib.

Sport1.az xəbər verir ki, bu barədə Premyer Liqa təmsilçisinin mətbuat xidməti məlumat yayıb.

Hüseynin futbola olan böyük sevgisi və həyat hekayəsi klub rəhbərliyi və üzvləri tərəfindən diqqət və həssaslıqla qarşılanıb. O, uşaq yaşlarından peşəkar futbolla məşğul olub. Lakin 15 yaşında məşq zamanı aldığı ağır baş zədəsindən sonra ona iflic diaqnozu qoyulub və artıq 10 ildir ki, əlil arabasında hərəkət edir.

Ziyarət zamanı Hüseynə əlil arabası hədiyyə edilib, həmçinin komandanın rəsmi forması gənc futbolsevərə təqdim olunub. Klubun prezidenti Kamran Əyyubovun Hüseynə ünvanladığı xoş arzular və sağlamlıq diləkləri də ailəyə çatdırılıb.

Görüşdə klub nümayəndələri və komanda üzvləri iştirak edərək Hüseynin sevincinə şərik olublar. Klub bu kimi addımlarla cəmiyyətin həssas təbəqələrinə dəstək olmağı və sosial məsuliyyət təşəbbüslərini davam etdirməyi qarşısına məqsəd qoyub.