“Barselona” Arauxoya əvəzləyici kimi “İnter”dən onu transfer etmək istəyir

“Barselona” müdafiə xəttini gücləndirmək üçün “İnter”in mərkəz müdafiəçisi Alessandro Bastoni ilə maraqlanır.

Sport1.az xəbər verir ki, ESPN-in jurnalist Matteo Morettoya istinadən yaydığı məlumata görə, Kataloniya klubunun idman direktoru Deku bu məqsədlə yaxın vaxtlarda Milana səfər edib və 26 yaşlı futbolçunun mümkün transferini müzakirə edib.

Bildirilir ki, “Barselona” Bastonini Ronald Arauxo üçün potensial alternativ kimi nəzərdən keçirir. Qeyd olunur ki, Arauxo bir müddət əvvəl emosional durumunu yaxşılaşdırmaq üçün komandadan müvəqqəti uzaqlaşıb. Bununla belə, mənbə vurğulayır ki, katalon klubunun Bastonini qış “transfer pəncərəsi”ndə heyətinə qatması kifayət qədər çətin görünür.

Qeyd edək ki, cari mövsümdə italiyalı müdafiəçi bütün turnirlərdə 19 oyunda meydana çıxıb, 1 qol vurub və 4 məhsuldar ötürmə ilə yadda qalıb. Bastoninin “İnter”lə müqaviləsi 2028-ci ilin yayına qədər qüvvədədir.